प्रा. विजय पोहनेरकर यांची
एक लाईटमुडची
खुसखुशीत कविता ......
--------------------------------------
" डोक्याला ताण करून घ्यायचा नाही "
--------------------------------------
उगीच गळा काढून
बोम्बलायचं नाही
अन डोक्याला ताण करून
घ्यायचा नाही
कामाच्या वेळेस
खूप काम करायचं
कष्ट करतांना
झोकून द्यायचं
पण Life कसं मजेत जगायचं .......
फिरा वाटलं फिरायचं
लोळा वाटलं लोळायचं
सुनंला काय वाटंल ?
पोट्टे काय म्हणतेल ?
फारसा विचार करायचा नाही
अन डोक्याला ताण करून
घ्यायचा नाही ..........!!
पार्टी करा वाटायली
पार्टी करायची
आरती करा वाटायली
आरती करायची
Picture पहुसा वाटतो ?
Picture पहायचा
समोसा खाउ वाटतो ?
समोसा खायचा
B. P. वाढंल का ?
अन शुगर कमी होईल का ?
मला जर ऍटॅक आला
तर दवाखान्यात कुणी नेईल का ?
अरे.......,
लोकं कुत्र्या , मांजराला सुद्धा उचलून नेतेत
तू तर माणूस आहेस ,
मग , नको ती चिंता करतो कशाला ?
स्वतःही परेशान व्हायचं नाही
अन दुसर्यालाही " जाळूजाळू घ्यायचं नाही "
अन डोक्याला अजिबात
ताण करून घ्यायचा नाही ....!!!
लाकडं बाभळीची आणतील
का चंदनात जाळतील ?
खालून-वरून रॉकेल टाकतील
का एखादा किलो तरी
चांगलं तूप टाकतील ?
सगळी पोरं येतील का ?
मला खांदा देतील का ?
फालतू गोष्टीची काळजी
करायची नाही
अन डोक्याला ताण करून
घ्यायचा नाही .......!!!
पोट्ट्याचं लग्न होईल का ?
त्याला कुणी पोरगी देईल का ?
नातवाला
english medium मधे टाकायचं
का Semi english मधीच ठेवायचं ?
अरे तुला काय करायचं ?
जाउंदे ना ! थोडं जग नं !!
नको त्या गोष्टीचा
कशाला ताण करून घेतो ?
स्वतःही उगीच जागतो
अन दुसऱ्यालाही जागवतो
बगलतलं काढून बाजारात
मांडायचं नाही
अन डोक्याला ताण करून
घ्यायचा नाही ......!!!!
लग्न झाल्यावर पोट्टं
विचारील का नाही ?
सुनेला पुरणाची पोळी
येईल का नाही ?
कुळाचार करंल का ?
सवाष्ण जेवू घालील का ?
शेती ठेवतील का विकतील ?
माझं श्राद्ध-पक्ष करतील का ?
आहेत का नाही हे फालतू प्रश्न ?
अरे बाबा ,
" मल्हार " गा वाटतो
मल्हार गा ...
मक्याचं कणीस खाउ वाटतं
मक्याचं कणीस खा
सिनेमा आवडतो ?
कुठल्याही सिनेमाला जा की !
कार्यक्रम पहायचाय ?
मग पहायचाच !
दिंडीत जाऊ वाटतं
पंढरपूरला जायचं
गाऱ्हाणे करायची नाहीत
अन डोक्याला ताण करून
घ्यायचा नाही .......!!!!!
सगळ्याचं सगळं करायचं
पण कमरेचा पंचा काढून
द्यायचा नाही
अन उगीच डोक्याला
ताण करून घ्यायचा नाही ......!!!!
No comments:
Post a Comment